Շվեդ Էկոակտիվիստ Գրետա Թունբերգը, որն ավելի վաղ հայտարարել էր Բաքվում ընթացող COP-29 համաժողովը բոյկոտելու մասին, ժամանել է Հայաստան։
«Արմենպրես»-ի փոխանցմամբ՝ այս մասին «Ֆեյսբուք»-ի իր էջում կատարած գրառմամբ հայտնել է Համայնքային մոբիլիզացիայի և աջակցության կենտրոնի նախագահ Օլեգ Դուլգարյանը։
«Մեծ պատասխանատվությամբ և բավականությամբ Հայաստան-Վրաստան սահմանին գործընկերների հետ դիմավորեցի շվեդ էկոակտիվիստ Գրետա Թունբերգին, ով ժամանել է Հայաստան՝ բոյկոտելով Բաքվում անցկացվող COP-29-ը։ Առաջիկա գործընթացների մասին շուտով», — իր գրառման մեջ նշել է Դուլգարյանը։
Մինչ Հայաստան ժամանելը Գրետա Թունբերգը բողոքի ցույց է կազմակերպել Վրաստանի մայրաքաղաք Թբիլիսիում՝ ընդդեմ Բաքվում ընթացող COP-29 կլիմայական կոնֆերանսի։ Նա խստորեն քննադատել է Ադրբեջանում կլիմայի և մարդու իրավունքների վիճակը՝ հայտարարելով, որ այդ երկիրն օգտագործում է COP-29-ը որպես ճակատ՝ կեղծ «կանաչ» օրակարգի ներքո վերահսկողությունն ուժեղացնելու և իշխանությունն ամրացնելու համար՝ սրելով տարածաշրջանային լարվածությունը:
Թունբերգը նաև խոսել է Լեռնային Ղարաբաղում Ադրբեջանի կողմից իրականացված էթնիկ զտումների, ինչպես նաև հայերի դեմ ռազմական հանցագործությունների մասին։
The Guardian-ի կողմից հրապարակված հոդվածում նա ընդգծել է, որ Իլհամ Ալիևի ռեժիմը ճնշումներ է գործադրում Ադրբեջանի քաղաքացիական հասարակության նկատմամբ։ Էկոակտիվիստը նաև նշել է Ադրբեջանի և Իսրայելի միջև կապերի մասին՝ մեղադրելով Ալիևին նավթի առևտրի և զենքի գործարքների միջոցով տարածաշրջանային հակամարտությունների սրման մեջ: